اتعبتني ياقلب
الطيب مايجذب غرام ومحبين
ابطش وسيد الغطرسه يعشقونك
جربتها ياقلب من عدة سنين
تصير طيب كلهم يكرهونك
ياقلبي الملتاع ماوفوا الدين
ناس تبيهم والبلى مايبونك
من يوم عمرك ست الين الثلاثين
عن شوفهم عن وصلهم يقطعونك
في حبهم شفت الغرابيل والبين
لكن تجاهلت وهم يجهلونك
قدام وجهك انت تسوى ملايين
ووراك والله ودهم يذبحونك
اتعبتني ياقلب بالله وبعدين
حرام ياخي ماتحس بطعونك
مرات اقول انك متيم ومسكين
وواقف معك وارخصلك العمر دونك
ومرات اقول بعالي الصوت امين
يارب تموت وانتهي من شجونك
ماغنت ام كلثوم عشق المجانين
دخبل ربك هم سبايب جنونك
صحيح اهل الحب ناس مساكين
بالله ماناظرت حالك ولونك
عن حبهم لوكان ما تبت للحين
وبصفحت وفيات الهوى يكتبونك
والطيب مايجذب غرام ومحبين
ابطش وسيد الغطرسه يعشقونك
جربتها ياقلب من عدة سنين
تصير طيب كلهم يكرهونك
تصير طيب كلهم يكرهونك
